香港新浪網 MySinaBlog
« 上一篇 | 下一篇 »
hkleftist | 22nd Aug 2005, 11:32 AM | 無產階級 | (504 Reads)
我地中產以前都係自己努力挨出頭,點解而家班基層唔得?

以前失業率同而家失業率根本唔可以相提並論,今天社會青年失業率高達1/4,想讀書又冇錢,以前都仲話有夜校,而家全部都係$$$,想做野,又話你冇經 驗,幾草野做沙x王,玩下手連車費都倒貼。以前工搵人,而家人搵工,以前冇電腦,因為人人都唔洗學電腦,而家就連小學都要識寫網頁。我見過有d低收入家 庭,屋企買唔起電腦,咪去d乜野人人有腦計劃度抽囉,好彩抽中部pentium,點知係裝linux...windows oem 都要6舊水,學校要學word ...又係錢,乜野dw,photoimpact ...全部都係$$$,上網又係要$$$,好似我地呢d衰衰地既中產階層,起碼都可以做完14粒鐘臨訓前上網係度吹水,整個phpbb響朵,但係呢個世界 上真係仲有好多人係要去同學屋企借電腦做工課,去社區中心輪電腦。



綜援,大家要試試嗎?

自力更生個個人都想架啦,有頭髮邊個想做肋厘,你估拿綜援真係好好玩咩,左鄰右里係咁唱,連D仔女都要俾人岐視,換來既只不過係一日幾十紋多D既生活費, 如果各位朋友講到綜援咁好,點解大家又唔去試下呢,聽日即刻劈砲,洗晒D積蓄,然後申請綜援,以後唔洗撈。事實上,綜援生活根本就唔好受,每10個失業者 中只有1個會去拿綜援,絕大部份拿綜援既人都係老弱傷病,食你唔飽又餓你唔死O個種。至於扼綜援,扼公屋,呢家野就實有架喇,例如有D唔生性既中產階級用 幾十萬裝修自己間公屋,又例如有D唔生性既中產階級年入百萬都霸住間公屋唔般,又例如有D唔生性中產階層虛報入息審查,拿綜援後再去外國旅遊HAPPY, 任何制度都會有漏動,但係O個D呃飲呃食既,畢竟只係少數,我地無必要上綱上線,敵視綜援基層。

假中產,真窮人。中產基層,窮人鬼打鬼。

當然我都反對乜野劫中濟貧,因為所謂中產,都只不過係暫時叫有能力「做到死下死下式自力更生」既窮人,如果你係中年,有一日老細發癲炒左你,最終玩下手都 係要去輪公屋,甚至食綜援。綜援係社保網,人有三衰六旺,你今日可以做個假中產,難保你大家他朝唔會變成真基層,今日大家親手隊穿左呢個網,日後自己真係 要用就冇得用喇。中產基層,其實都係一個階級裡面不同程度既受害者。香港有福利主義,但係唔係福中產基層,而係福個班有錢佬,幾百億幾千億咁送出去。可憐 我地呢班工人階級,仲為左個十億八億係度互隊。後面班商家佬真係掩住半邊嘴笑。

貧窮皆因呢個以利潤為先既社會制度有問題,要解決制度問題唔係靠扶貧,而係靠廣大既基層中產窮人組織起來,團結就是力量。所以,財政預算案,希望各位假中產一切出黎反對商人福利主義,要求向賺取暴利既本地、跨國大財團增加高額累進利得稅!算係小試牛刀。

假中產,真窮人--兼為基層辯護
同時貼於【中產之聲】
http://www.voicemiddleclass.com/viewtopic.php?p=72#72